స్వర్గలోకంలో అమృతభాండం ఒలికి జారిన అమృతపు చుక్క భూమి మీద పడి తాళ వృక్షమై మొలిచిందట. ఈ మాటలో ఎంత నిజముందో తెలియదు కానీ.. తాటిచెట్టు కల్పవృక్షమని.. తాటికల్లు దివ్యౌషధమని తాజా పరిశోధనల్లో వెల్లడైంది. తాటికల్లుతో క్యాన్సర్ కు చెక్ పెట్టవచ్చని ఉస్మానియా పరిశోధనా విభాగం తేల్చింది. చెట్టునుంచి అప్పుడే తీసిన తాటికల్లులో మనిషికి మేలు చేసే 18 రకాల సూక్ష్మజీవులున్నాయని ఓయూ పరిశోధనా విభాగం వెల్లడించింది. ఈ విషయాన్ని ఇండియన్ ఇనిస్టిట్యూట్ ఆఫ్ కెమికల్ టెక్నాలజీ కూడా ధృవీకరించింది. ఖమ్మం, వరంగల్‌ జిల్లాలో ఉస్మానియా బయలాజికల్ సైన్స్ ప్రొఫెసర్ భూక్యా భీమా 53 రకాల తాటికల్లు నమూనాలను సేకరించి టెస్టులు చేయగా తాటికల్లులో ఔషధగుణాలు మెండు అని రుజువు అయింది.

ఓయూ బయాలజీ ల్యాబ్ లో సూక్ష్మజీవులను వృద్ధి చేసే రసాయనంలో తాటికల్లు చుక్కలు వేసి పరిశీలించి, 48 గంటలపాటు ఇంక్యుబేటర్‌లో పెట్టగా.. ఆసక్తికర విషయాలు వెల్లడయ్యాయన్నారు ప్రొఫెసర్ భూక్యా భీమా. 53 రకాల సూక్ష్మజీవులను తాటికల్లులో గుర్తించారు. వీటిలో 18 రకాల సూక్ష్మజీవులు, మనిషిలోని వ్యాధికారక సూక్ష్మజీవులను చంపుతున్నట్లు ఐఐసీటీ సైంటిస్టులు (అంజనదేవి, వంశీకృష్ణ) గుర్తించారు. తాటికల్లులో చఖరోమైసెస్‌ అనే సూక్ష్మజీవి మనిషి కడుపులో క్యాన్సర్‌ వ్యాధికి కారణమయ్యే వోబీఎస్‌2 అనే క్యాన్సర్‌ కారక కణాలను సైతం నిరోధించే గుణం ఉందన్నారు. డయేరియా, టైఫాయిడ్‌ వ్యాధులకు కారణమయ్యే వైరస్ ను తాటికల్లులోని యాంటిబయోటిక్ గా పనిచేస్తుందని తేలింది. మసాలా, మాంసాహారాలు, జంక్ ఫుడ్ వంటి ఆహారపు అలవాట్లతో అస్థవ్యవస్థమైన మానవుడి జీర్ణవ్యవస్థని బాగుచేస్తుందని వెల్లడించారు పరిశోధకులు. పరిగడుపున ఫ్రెష్ తాటి లేదా ఈత కల్లు తాగటం ఆరోగ్యానికి ఎంతో మేలని మన పూర్వీకులు ఏనాడో చెప్పడం జరిగింది. ఇప్పుడు వారి మాట నిజంగా రుజువైందన్నారు పరిశోధకులు.

కాకపోతే, పులిసిన లేదా పుల్లగా మారిన కల్లు తాగితే మాత్రం అనారోగ్యం అన్నారు పరిశోధకులు. ఎందుకంటే చెట్టు నుంచి తాటి లేదా ఈతకల్లును గంటలోగా తాగేయాలన్నారు. లేదంటే అది ఆల్కహాల్ గా మారి అనారోగ్యానికి కారణమయ్యే బ్యాక్టీరియా అందులో వృద్ధి చెందుతుందని తెలియజేసారు ఓయూ పరిశోధనా విభాగం శాస్త్రవేత్తలు.