మొబైల్ వినియోగదారులకు పరిచయం అవసరం లేని బ్రాండ్ నోకియా. బడా బాబుల నుండి పేదవారి వరకు అన్ని రకాల ప్రజలకు తగ్గట్టు సేవలు అందించింది ఈ సంస్థ. కొన్నేళ్లుగా మైబైల్ రంగాన్ని శాసించిన నోకియా మొబైల్ ఫోన్స్ కొంతకాలంగా మార్కెట్లోకి విడుదల కాకపోవటం అందరికి తెలిసిన విషయమే. కొంత విరామం తీసుకున్న నోకియా స్మార్ట్‌ఫోన్ల మార్కెట్లోకి మళ్లీ ప్రవేశించింది. ఆండ్రాయిడ్‌ ఆపరేటింగ్‌ సిస్టమ్‌తో కూడిన నోకియా 6 మొబైల్‌ను చైనా మా ర్కెట్లోకి విడుదల చేసినట్టు నోకియా బ్రాండ్‌ హక్కులు కలిగిన ఫిన్లాండ్‌ కంపెనీ హెచ్‌ఎండి గ్లోబల్‌ ఆదివారంనాడు ప్రకటించింది. దీని ధర 1,699 యువాన్లు (సుమారు రూ.16,000). చైనా ఇ-కామర్స్‌ పోర్టల్‌ జెడిడాట్‌కామ్‌ ద్వారా అమ్మకాలను మొదలుపెడుతున్నట్టు తెలిపింది. త్వరలోనే అన్ని మార్కెట్లలోనూ ఈ ఫోన్‌ అందుబాటులో ఉంటుందని తెలిపింది.

ఈ నోకియా 6లో ఆండ్రాయిడ్‌ 7.0 నౌగట్‌ ఆపరేటింగ్‌ సిస్టమ్‌, 5.5 అంగుళాల ఫుల్‌ హెచ్‌డి డిస్‌ప్లే, 2.5డి క్వాడ్ గ్లాస్‌, డ్యూయల్‌ సిమ్‌, 4జిబి రామ్‌, 64 జిబి ఇంటర్నల్‌ మెమరీ, 16 మెగాపిక్సెల్‌ వెనుక కెమెరా, 8 మెగాపిక్సెల్‌ ముందు కెమెరా వంటి ఫీచర్లు ఉన్నాయి. ఈ ఏడాదిలో నోకియా బ్రాండ్‌తో ఆరు నుంచి 7 ఆండ్రాయిడ్‌ స్మార్ట్‌ఫోన్లను విడుదల చేయాలని హెచ్‌ఎండి గ్లోబల్‌ యోచిస్తోంది. ప్రస్తుత మార్కెట్లో ఇంత తక్కువ ధరలో ఇన్ని ఫీచర్స్ కలిగిన మొబైల్ లేదు. అలాంటిది, అతి పెద్ద బ్రాండ్ ఐన నోకియా ఇంత తక్కువగా వస్తుండటం గమనార్హం. ఈ మొబైల్ గనుక మన దేశ మార్కెట్లో విడుదలైతే నోకియా మొబైల్స్ హాట్ కేకుల్లా అమ్ముడు పోవడం తధ్యం.