ఔను..!  సెప్టెంబరు 9, 1914 న పుట్టుక నీదే… నవంబరు 13, 2002 న చావూ నీదే…   కానీ…! గీ రెండిటి నడిమిట్ల నీబతుకంతా ఒక ప్రాంత ఆత్మ గౌరవానిదీ…

కాళోజీ…!

వందనాలు బాపూ…!

నీ యాదిలో….

పుటుక నీది

చావు నీది

బ్రతుకంతా దేశానిది

నేనంటే నేడు

నా గొడవంటే నాడు

నిజమో కాదోకల రుజువు

నీవు నేనూ వాడూ

నేనంటె నేటి మనస్థితి వైనం

నెనంటె భరత పౌరుడు

నా గొడవ ఆ పౌరుని స్థితి

నేనంటే ఒక వోటరు

నా గొడవ వోటేసేవాడు

నేనంటే తిరుగుబాటు దారు

నా గొడవ మన తిరుగుబాటు

సాగిపోవుటె బ్రతుకు

ఆగిపోవుటె చావు

సాగిపోదలచిన

ఆగరాదిచటెపుడు

ఆగిపోయిన ముందు

సాగనే లేవెపుడు

వేచియుండిన పోను

నోచుకోనే లేవు.

తొలగి తోవెవడిచ్చు

త్రోసుకొని పోవలయు.

నా గొడవ నాది-అక్షరాల జీవనది

నానా భావనా నది- నీనా భావన లేనిది

మన భావన నది – సమ భావన నది

ఎద చించుక పారునది- ఎదలందున చేరునది

నా గొడవ నాది- కాళోజీ అనునది

దోపిడి చేసే ప్రాంతేతరులను

దూరం దాకా తన్ని తరుముతం

ప్రాంతం వాడే దోపిడి చేస్తే

ప్రాణంతోనే పాతర వేస్తం

నావారల చేరదీసి

నానా విధ బోధలతో

నాణ్యంగా నన్ను కొరిగి

నలుబదైదు సంతకాల

నాటకమాడిన నటుడా

నాగరికుడా విను!

కోటిన్నర మేటి ప్రజల

గొంతోక్కటి గొడవొక్కటి

తెలంగాణ వెలిగి నిలిచి

ఫలించెలె భారతాన

భరత మాతాకీ జై

తెలంగాణ జిందాబాద్

దోస్తుగ ఉండే వారితొ మేమును

దోస్తే చేస్తం – ప్రాణమిస్తం

ఎంతకు అంత అన్న ధోరణితో

చింతమాని బ్రతుకును సాగిస్తం

1.”అన్య భాషలు నేర్చి ఆంధ్రంబు రాదంచు

సకిలించు ఆంధ్రుడా! చావవెందుకురా!”

2. తెలంగాణా భాషనెపుడు ఈసడించు భాషీయుల

సుహృద్భావన ఎంతని వర్ణించుట సిగ్గుచేటు

అన్యాయాన్నెదిరిస్తే

నా గొడవకు సంతృప్తి

అన్యాయం అంతరిస్తే

నా గొడవకు ముక్తి ప్రాప్తి

అన్యాయాన్నెదిరించినోడు

నాకు ఆరాధ్యుడు

భాష కోసమో,యాస కోసమో ఈ రెండికీ మూలమైన అస్థిత్వం కోసమో ఎప్పటివో ఎందరివో కలల్ని తన రెండు కళ్లతో స్వప్నించిన కాళోజీ…! పుట్టుకా చావుల మధ్య బతుకంతా దేశానిదన్న కాళోజీ..!! ఈ రోజు యావత్ తెలంగాణా నిన్ను స్మరించుకుంటది నీ జయంతి ఈనాడు తెలంగాణా భాషా దినొత్సవం గా చెప్పుకుంటది.

జోహార్ కాళోజీ…! అని గుండెల నిండుగా నిన్ను తలుచుకుంటది…!