గుడికెళ్ళినప్పుడో, పండగ సమయాల్లోనే అరుదుగా ప్రసాద రూపంలో పచ్చి కొబ్బరిని తింటుంటాం. పచ్చి కొబ్బరిని పచ్చళ్లు నూరేయడం, ఎండబెట్టి కుడుకలుగా చేయటం కాకుండా.. నేరుగా పళ్లతో కొరికి తింటున్నారా..? అయితే మీ ఆరోగ్యానికి ఎంతో మేలు చేసినవారవుతారని ఆరోగ్య నిపుణులు చెబుతున్నారు. పచ్చి కొబ్బరిలో ఆరోగ్యానికి మంచి చేసే పోషకాలు పుష్కలంగా ఉన్నాయని నిపుణులు తెలిజేస్తున్నారు. గుండె సంబంధిత సమస్యలున్నవారు పచ్చి కొబ్బరిని తినటం వల్ల, ఇందులోని కొలెస్ట్రాల్.. గుండె పనితీరును మెరుగుపరచటమే కాకుండా పచ్చి కొబ్బరిలో లభించే ఉపయోగకరమైన కొలెస్ట్రాల్.. బరువును కూడా తగ్గిస్తుంది.

పచ్చి కొబ్బరిలో యాంటీ వైరల్‌, యాంటీ బ్యాక్టీరియల్‌ గుణాలు ఎక్కువగా ఉంటాయి. ఇవి రోగనిరోధక శక్తిని పెంచుతాయి. నాలుగైదు పచ్చి కొబ్బరి ముక్కలు తింటే చాలు శరీరానికి తక్షణ శక్తి అందుతుంది. ఎక్కువగా ఆటలాడే పిల్లలకు పచ్చికొబ్బరిని తినిపించవచ్చు. కొబ్బరి తినడం వల్ల జీర్ణశక్తి మెరుగుపడుతుంది. శరీరంలోని వ్యర్థాలు బయటకు పోతాయి. చర్మానికీ మేలు జరుగుతుంది. వృద్ధాప్య ఛాయలకు చెక్ పెట్టవచ్చు. కొబ్బరిని తినడం ద్వారా థైరాయిడ్‌ సమస్య అదుపులో ఉంటుంది. మూత్రనాళాల ఇన్ఫెక్షన్లకు చెక్ పెట్టవచ్చు. కొబ్బరి ఎముకలు, దంతాలు, గోళ్ళకు మేలు చేస్తాయి. నోటిపూతను నయం చేస్తుంది. కొబ్బరి మనందరికీ అందుబాటులో ఉంటుంది కాబట్టి, ప్రతిరోజు తిన్నట్లయితే ఆరోగ్యకరంగా ఉండవచ్చు.